أول شيء السلام عليكــم
بيني وبينكم ماش العنوان أحسه مدري وش يبي بس وش اسوي هذا اللي طلع معي
وثاني شي أنا تنحه بالمقدمات علشان كذا نبدأ الموضوع والزبده بالمضمون مو بالمقدمه
!.المواصفات .!
أقصد مواصفات شريكة العمــر
يعني أنتم يالشباب لما تجون تخطبوون تسردوون قائمه من الطلبات لأهلكم >>وهنا تبدأ البلشه
1/ أبيها طوييله ..
2/ أبيها رشييقه وبطنها لاصق بظهرها وتكون مخصررره مثل الجرّهـ
3/وأبي شعرها حرريير وبشرتها شفافه >>يعني من زود البياض
4/أبي عيونها كأنها فناجيين ..وابي خشمها أطول منها وابي شفايفها نتفه وابيها مخدخده ..وووالخ .
وبعدين تجيكم المواصفات كامله مكمله واي شي مايعجبكم ومايصيرعلى رضاكم يتم تغييره بدون مايحاسبكم احد او شي زي كذا ..
المهم المغزى من هالحتسي حنا يالبنات المغلوب على امرنا بكل شي
يعني في بعض البنات لما تتشرط وتقول ابغاه كذا وماأبغاه يكوون كذا ينغسل شراعها والناس يشوفون فيها نوع من السخافه والسذاجه وما شابه
يعني البنت مالها حق تختار مواصفات فارس احلامها وشريك حياتها وهااز بندها >>متعوب على الاخييره
انا كنت اعرف وحده صار لها كذا يعني مرره تقدم لها واحد تقوول مافيه شي ينعاب وظيفه عدله وسمعه زيينه واخلاق ماشاء الله ..!
بس رفضته يوم سألناها ليش قالت شكله مو عاجبني وسميين وكرشته تمشي قبله
ويوم دروا اهلها ان هذا سبب الرفض تقوول زقروا فيني وهاوشوني وكأني كفرت يعني
وقسسم لو انها ولد كان محد كلمها ولااحد عاتبها ..ليش
ليش كذا لاتقولون لي لانها بنت
والبنت مالها إلا زوجها وبيتها والرجال مايعيبه شي ومدري ايش وقسم ملينا من هالكلام >>
هو صحيح ان البنت مالها إلا وشسمه >>
بس لما يكوون على ذوقها وتكون مقتنعه فيه يعني لو صار فيه شي ينفرها منه وموعاجبها
فيه من حقها ترفض >>طبعا بالمعقوول
ولاننسى الاخلاق
يعني اانا اشوف بنات الله يهديهم والله موب صاحين يرفضون على اتفه الاسباب لدرجة اني
احس ان بعض عياال أأدم تعقدوا
اللي ترفضه لان اسمه مو حلو
واللي ترفضه لان صوته خششن >>يعني رجاال بالله وش
بيكون صوته ..
واللي ترفضه علشان ضروسه عفسه وحوسه وخبصه تقول واحد قدام وفوقه 2 مجاناً
>>وقسسم ذي فقعتني ضحك يعني بالله هو وش ذنبه ربه خلقه كذا ..
بس وش اقوول ,,عقوول الشكوى لله ..!
طيب بالله ياشباب أنتم ايش رايكم يعني تشوفون إن هالشي غلط او عييب أو انه مو من حق بنات حوآآء ..!
وأخيراً ماننسى إن الشكل مو كل شي ويبقى الجماال جماال الرووح
ودي لكــــــــم ...